يــوم الأحـد: مـُـدن بدون سـيــارات

        ضروري نـتــخــلا ّوا على الطــُـموبيلات نهار الحـدّ فى أوسط المدون المغربية، بالأخص السياحية منها، بحال مراكش، أكادير، طنجة، فاس، مكناس، الصويرة، ورزازات، الداخلة إلخ، أو إيـلا بغاوْا يتبنـــّـاوْا هاد المبادرة مدون أخرى صغار، ولا ّ حتى دواور، مرحبة بيهم! ضروري تكون كـتـــّــناسب مساحة الدائرة مع حجم المدينة، مثلا الدار البيضا عل الأقل 4 كيلوميتر، الرباط 2 كيلوميتر إلخ، هاكدا بغينا إكونوا الوزراء، لا ديال وزارة النقل ولا ّ ديال السياحة، الوزراء دياولنا مهووسين غالبا غير باللغط أو الخطابات السياسية الجوفاء بلا ما إقـدّموا لينا أفكار جديدة، جريئة كـتــّـماشى مع متطلبات، مستقبل المواطنين أو المواطنات، مع الأسف الشديد الأغلبية الساحقة ما عـمــّـرها سمعات بالإبداع السياسي اللي تبنــّاوه ساسة الدول العظمى، على أقصى تقدير كـنـتــوفــّـروا على مدراء، مدبرين مؤسسات حكومية، بلا جرءة ولا آليات التفكير، التحليل أوْ التنظير، اللي كـيـعـرف يدوي شي شوية، كان من حزبك، قبيلتك ولا ّ من صحابك وزّرو، ولاكن ضروري نكونوا منصفين، كاينين شرفاء، نبلاء، "ولو ندرة"، هادوا اللي بغينا، ماشي اللي كـيتسوّلوا "التــّـاويزاريت"، بجميع الوسائل. 

   
 
       نهار الحد بلا طموبيلات غادي إكون عندو تأثير بليغ على ذهنية السائق المغربي، أولا ً، غادي يدرك بأنه عندنا بالفعل مشكل متعلق بعملية النقل أو أنه فاعل، طرف منو أو ماشي "غير معني به"، ثانيا، غادي نشيروا للرأي العام الدولي، للزوار الأجانب بالأخص اللي حنا فى حاجة ماسة للاستقطاب عدد مهم منهم، نظرا ألــْـعـدم  توفرالمغرب على ثروة معدنية "تـذكر"، الفوسفاط، فى العمق، والو! المبيعات ما كـتـفـوتش 5 مليار دولار فى العام، أو هاد الشركة العمومية ما كتـشـغــّـلش كثر من 000 18 فرد، إيـلا جينا نقارنوا راسنا مع دول قزمية متقدمة بحال فينلاندا، 5 مليون نسمة، غادي نكتاشفوا أن "نوكيا"، شركة فينلادية خاصة، يعني ما كـتــّـوفــرّش على دعم، متيازات الدولة، كـتـشـغل كثر من 000 100 شخص "عبر العالم"، أمــّـا مبيعاتها كتفوق 35 مليار دولار، صراحة، هادي مهزلة! أو هاد الدويلة باش كيقراوا أولاد البلاد؟ بالفينلاندية، غير كـيخورجوا منها، ما كايـنش اللي يفهمهم إيلا ما هضروش بالنكليزية.

       غير تكون مجموعة من أوسط مدون المملكة مقفرة من الطموبيلات، عاد غادي يمكن لينا نستنشقوا الوهاء الطلق، نكتاشفوا الذات، نسـمـعوا الطيور أو ندركوا أن الفضاءات الخضرة شبه منعدمة أو ما عندناش فاين نكلسوا إيلا بغينا نرتاحوا شي شوية، يعني حنا مطــّـالبين اليوما نكثــّـروا، نـزرعوا فضاءات خضرى، حدائق عمومية جديدة فى جسم الأسمنت اللي تـعشـقوا فيه المهندسين المعماريين أو أمــّـالين الشكارة، هاكدا غادي نسترجعوا لمدون دياولنا اللي سلباتهم، حـجــباتهم الطموبيلات علينا.

 

       قامت مدينة مراكش بتنظيم نهار، نهار واحد، فى عمرها ب "يوم بدون سيارات"، ولاكن هاد الشي ما كافيش، ضروري الإسمرارية أو التخلـّـي على الخرجات الموسمية اللي كـتـدّل على عدم الرشد، النضج أو عدم نظرة، ستراتيجية شمولية، مدون كبر من الدار البيضا أو تبنـــّات فكرة "يوم بدون سيارات" بحال بوكوطا، جاكرطا، لندن، سانفرانـسيسكو، باريز، بروكسيل  إلخ، يعني هاكدا غادي نبنيوْا جسر قوي مع زوار، مع مدن عندها صيت أو باع على الصعيد العالمي، هادي هي سياسة القرب اللي بغينا، باش حتى إيلا جاوْا عندنا السياح من دول مختلفة، بالأخص المتقدمة منها، يلقاوْا نفس الأرضية، نفس التصور، نفس التفاعل مع الساكنة المحلية، بالطبع بلا طمس خصوصيات كل دولة "على حدة".

        الإمتيازات اللي كتــّـوفر عليها هاد العملية "شتى": جميع العائلات المغربية غادي يبقاوْا كيجيوا لوسط المدينة باش يتساراوْا بكل راحة أو طمأنان بلا ما إخافوا على أولادهم من الطموبيلات اللي كيشـكــّـلوا بالفعل خطر مدقع على الناشئة، الإقتصاد غادي يزدهر، الألفة، الإستئناس بين جميع الطبقات الإجتماعية غـادي أتــّـقوّى، أكيد سلوك الناس غادي أتـــّـغيـر، "يوم بدون سيارات" غادي إشـجـّع على ستعمال النقل الجماعي، الترامـوي مثلا، على التقليص من فاتورة البترول أو المشتقات ديالو، توظيف البدائل، بحال الدراجة الهوائية، المشي على الرجلين اللي منافعو "لا تحصى"، بحال تنشيط الدورة الدموية، تحصين الذات من بعض الأمراض المزمنة بحال داء السكر، القلب، تجلط الدم، الروماتيزم إلخ، أو هادا مرتبط بطريقة مباشرة مع تقليص فاتورة التشخيص الطبي أو الإدمان على المنتجات الصيدلية، ضروري تكون "الكنوسب"، "الصندوق الوطني لمنظمات الإحتياط الإجتماعي" فى طليعة هاد المشروع، الحركية، هاكدا غادي يمكن ليه إقلص من التكاليف الباهضة المتعلقة بالتطببب أو ترميم صحة المواطن، المواطنة.  

         المواكبة الإعلامية ضرورية، قبل من تفعيل هاد المشروع المجتمعي، ما تعملمش بحال "مـسار" اللي فاجئ الناس فى قلب الدار، نـوّض العجاجة، الغـبار حتى قال هادا، لاخور الله أو من هادا مُـنكار، ماشي حتى إطـيح الدرّي فى البير، عاد تـجي نتا "نعامس" باش تـورّينا كيفاش بغيتي تـنـقـدو، حصـّـن بعدا فــُـمّ البير بشي شـبـكة. حتى حتجـّـوا الأباء أو التــْـلامذ فى جميع ربوع الممكلة "عن كاملها" عاد جا السي رشيد باش يشرح لينا مزايا "مسارو" فى التلفاز، هادي الخطوة الثانية قبل من اللولة، ولاكن فى المغرب لا تستغرب، أين السارح يـأكولو مع الـدّيبْ.

د. مراد علمي
أستاذ جامعي، كاتب ومترجم