|
|
بـْـقــى في دارك!
أضيف في 21 مارس 2020 الساعة 36 : 14
بـْـقــى في دارك!
إيلا كتبغي حبابك، صحابك، حومتك، بقى فى دارك،
لأن هاد المحنة ما كتعرف مـْـلاغة، تهـلا ّ فى جارك،
الجار، الجيران، كولـّـنا مجندين، واحد يخرج للسوق،
بلا الصغير، الكبير، ماشي أيام عادية كـول، ذوق،
إيلا حـطــّـيتي يدّيك على الخبزة خودها، بْلا ما تسوّل،
لتازم ما تعادي حـدّ، ولا تخـلــّـي هاد الغول يتغـوّل،
يعمل فينا حالة، حالتين، الله إنجي المغرب، ناسـو،
من المحاين، الشدّة، الضائقة، حتى تحـلى نعــاسو،
من طنجة للـڭـويرة، وجدة، الرباط، الدارالبيضا،
أو اللي بين يدّيه قتراحات، حوايج مهمة، مفيدة،
ما يبخلش علينا بيها، إكون فى مستوى الحدث،
باش هاد خيـيــّـنا يفهم راسو، ماشي من داتنا يقتات،
ولا ّ ڭـاع نسمحوا ليه، يبقى يتسارى فى أوسطنا
بلا ما نحاصروه، نطوّقوه، حتى إحـسّ بالـغـبنة،
هاد خيـيــّـنا كيقـلــّـب على من إنقـز، يضحك،
نســنسـلوه بوعينا، عقلنا، باش ولا بـيـدّ يمسك،
الدولة قايمة بالواجب، كتـنبـــّـه الناس، بالمكبّر،
اللي ما بغاش يسمع كاين القانون، كيردع، مـدبّر،
نوقفوا مع الدولة الي باغية الخير للجميع الشعب
باش هاد خيـيـّـنا، يـڭلس بوحدو، يبكي، يجدب،
ما أدّاها فيه حـدّ، فى عائلتو، فى أولادو، جدودو،
ما لـقى ما يكول، يسرط، ذاب لحـمو فى جلودو،
أمـّـا الوسواس ما كاين لاش إيلا بقينا فى ديورنا،
إيلا طبـّـقنا التعليمات بالحرف، المسؤولية دورنا،
لأن اللي خاف نجى، أمـّـا الزعامة، الوهم، البطولة،
هادا عـْـمل ما بغى فى العالم، غول تزوج بغـولـة،
الإتحاد، التضامن فى هاد الوقت ضرورة الساعة،
ما حنا فى حاجة للي يخلعنا، يعمل من بوقو فزاعة،
كان ساكن فى التويتر، الفايس بوك، إنستاڭـرام،
نغربلوا المعلومات، الطفيليات، مصيرهم الإحجام،
العدول، الزهد واجب اليوما، غـدّا، باش نقضيوْا
على هاد الضيف الثقيل، ولا هْواه، مزاجو نرْضيوْا.
إكون فى عون الصف الأمامي من الطبة، الفرمليات،
اللي حتى هوما عندهم واليدين، حباب، دْراي، درّيات،
بلا ما ننسناوش اللي كياخذوا منـّـا الفلوس فى المتاجر،
أمـّالين البيسريات، قنوات مجهزة، مفتوحة، معابــر،
أمـّـا عمـال النظافة الله إجازيهم بالخير، عل الأقـل الزبل
إكون فى أكياس مغلوقة، ولا يبقى من كل درب إطـلّ،
كولشي بين يـدّينا، نقطعوا الطريق على هاد خيـيــّـنا،
نبقاوْا فى ديورنا، واجبنا التضامن، ما عمـّـرنا نـْـسينــا.
د. مراد علمي
|
|
|
[email protected]
التعليق يجب أن يناقش موضوع المادة
|
|
|